നടി ലെന തനിക്ക് മാജിക് മഷ്റൂം കഴിച്ചതിനെ തുടര്ന്ന് 14 വര്ഷത്തോളം ജീവിതത്തിലുണ്ടായ പ്രശ്നങ്ങളെക്കുറിച്ച് ഈയിടെ വെളിപ്പെടുത്തിയിരുന്നു.
ആത്മീയമായ അന്വേഷണങ്ങൾക്കിടയിൽ കൊടൈക്കനാലിൽ വച്ച് ആണ് ‘മാജിക് മഷ്റൂം’ പരീക്ഷിച്ചത്. ഇതിനെ തുടര്ന്ന് ലെനയെ ആശുപത്രിയിലാക്കി. ഇതിനെ ‘ഭ്രാന്ത്’ എന്ന് വീട്ടുകാരും സുഹൃത്തുക്കളും തെറ്റിദ്ധരിച്ചതോടെ ഏകദേശം 14 വർഷത്തോളം കടുത്ത സൈക്യാട്രിക് മരുന്നുകൾ കഴിക്കേണ്ടി വന്നു. മരുന്നുകളുടെ പാർശ്വഫലങ്ങൾ മൂലം ശരീരഭാരം കുറയുകയും കടുത്ത വിഷാദത്തിലേക്ക് വഴുതി വീഴുകയും ചെയ്തു. സാമ്പത്തികമായി തകർന്നടിഞ്ഞ സമയത്ത് ആത്മഹത്യാ ചിന്തകൾ പോലും തന്നെ വേട്ടയാടിയിരുന്നതായി ലെന വെളിപ്പെടുത്തി.
തന്റെ ജീവിതത്തിലെ ഏറ്റവും വെല്ലുവിളി നിറഞ്ഞ ഘട്ടമായിരുന്നു ഇതെന്ന് ലെന. ഒടുവിൽ പള്ളിയിൽ പോയി മനമുരുകി പ്രാർത്ഥിച്ച നിമിഷം തന്നെ തേടിയെത്തിയ ‘ഓമനത്തിങ്കൾ പക്ഷി’ എന്ന സീരിയലാണ് ജീവിതത്തിൽ വഴിത്തിരിവായത്. ജീവിതത്തിൽ തകർന്നുപോയ ഒരു പെൺകുട്ടിയുടെ വേഷം തന്റെ അപ്പോഴത്തെ അവസ്ഥയുമായി ചേർന്നുനിൽക്കുന്നതായിരുന്നു. ആ സീരിയലിലൂടെ സ്വന്തം കാലിൽ നിൽക്കാൻ പ്രാപ്തയായ താൻ, വർഷങ്ങൾക്കിപ്പുറം ഒരു വിജയിയായി ലോകത്തിന് മുന്നിൽ നിൽക്കുമ്പോൾ തന്റെ സത്യങ്ങൾ തുറന്നുപറയാൻ ഭയമില്ലെന്നും ലെന കൂട്ടിചേർത്തു. ഇന്ന് ഗഗൻയാൻ ദൗത്യം ഗ്രൂപ്പ് ക്യാപ്റ്റൻ പ്രശാന്ത് ബാലകൃഷ്ണന്റെ പങ്കാളിയായി പുതിയൊരു ജീവിതം നയിക്കുകയാണ് താരം.
മയക്കമരുന്ന് കഴിച്ചതുപോലെ ഭ്രമകല്പനകളും ദിവാസ്വപ്നങ്ങളും സമ്മാനിക്കുന്ന ഈ മാജിക് മഷ്റൂം എന്താണ് ?
1938ലാണ് ആല്ബര്ട്ട് ഹോഫ്മാന് എല്എസ് ഡി എന്ന രാസപദാര്ത്ഥം കണ്ട് പിടിച്ചത്. ഇത് നിരവധി തലമുറകളെ സ്വാധീനിച്ച മയക്കമരുന്നായിരുന്നു. കൂണുകളെ കുറിച്ച് പഠിക്കുന്ന ഒരു ശാസ്ത്രജ്ഞന് 1957ല് ഒരു കൂണ് ആല്ബര്ട്ട് ഹോഫ് മാന് അയച്ചുകൊടുത്തു. അദ്ദേഹം ആ കൂണിലെ രാസവസ്തുക്കളെ വേര്തിരിച്ചെടുത്തു. അതില് സൈലോസൈബിന് എന്ന രാസവസ്തു ഉണ്ടെന്നും ഇത് മയക്കമരുന്ന് കഴിച്ചാലുള്ളതുപോലെ ഒരു സൈക്കഡലിക് ഇഫക്ട് കഴിക്കുന്നവരില് ഉണ്ടാക്കുമെന്നും ആല്ബര്ട്ട് ഹോഫ്മാന് കണ്ടെത്തി.
മാജിക് മഷ്റൂം അഥവാ മാജിക് കൂൺ എന്നത് സൈലോസൈബിൻ അല്ലെങ്കിൽ സൈലോസിൻ എന്നീ രാസവസ്തുക്കൾ അടങ്ങിയ ഒരു തരം കൂൺ ആണ്. ഈ രാസവസ്തുക്കൾ നിങ്ങൾക്ക് യഥാർത്ഥമല്ലാത്ത കാര്യങ്ങൾ കാണാനും കേൾക്കാനും അനുഭവിക്കാനും കാരണമാകുന്നു. കഴിക്കുന്നവരുടെ ഇന്ദ്രിയങ്ങള് ഉത്തേജിപ്പിക്കപ്പെടുന്നു. കാണുന്ന നിറങ്ങള് കൂടുതല് ആസ്വാദ്യകരമായി അനുഭവപ്പെടും. കേള്ക്കുന്ന പാട്ടുകള് കൂടുതല് മധുരിതമായി തോന്നും. ഒന്നിനെക്കുറിച്ചും യാതൊരു ദുഖമോ, വിഷാദമോ ഉണ്ടാകില്ല. പരമമായ ആനന്ദം. അതാണ് ഈ കൂണ് കഴിക്കുന്നവരില് ഉണ്ടാവുക.
മൂന്നാര്, കൊടൈക്കനാല് യാത്രകളിലാണ് സാധാരണയായി ആളുകള് മാജിക് മഷ്റൂം കഴിക്കാറുള്ളത്.
കൂണ് തേനില് മുക്കി കഴിക്കാന് പറ്റുന്ന ചില ഹോട്ടലുകള് ഇവിടെയുണ്ട്. മാജിക് കൂൺ ഉണങ്ങിയതോ പൊടിച്ചതോ ആയ രൂപത്തിലും വരും. ഈ കൂണ് കഴിച്ചാല് സൈലോസൈബീന് എന്ന പദാര്ത്ഥം ഈ കൂണില് നിന്നും ശരീരത്തില് എത്തിയാലുടന് പദാര്ത്ഥം പ്രവര്ത്തിച്ചു തുടങ്ങും.
ഇതോടെ നമുക്ക് കാണാത്തത് കാണാനും കേള്ക്കാത്തത് കേള്ക്കാനും കഴിയും. ശരിയ്ക്കും മയക്കമരുന്ന് കഴിച്ചതുപോലുള്ള അവസ്ഥ.
