കൊച്ചി : അങ്കമാലിയില് വെച്ചുണ്ടായ ദാരുണമായ വാഹനാപകടത്തില് മസ്തിഷ്ക മരണം സംഭവിച്ച ജസ്ലിയയുടെ അവയവങ്ങള് ദാനം ചെയ്യാന് ബന്ധുക്കള് എടുത്ത തീരുമാനം നാടിനാകെ മാതൃകയാവുകയാണ്.
വൈപ്പിന് എടവനക്കാട് സ്വദേശിയായ ജസ്ലിയ അങ്കമാലി മോണിംഗ് സ്റ്റാര് കോളേജിലെ രണ്ടാം വര്ഷ ബി.കോം വിദ്യാര്ത്ഥിനിയായിരുന്നു. സാധാരണ കുടുംബത്തിന്റെ പ്രാരബ്ധങ്ങള്ക്കിടയിലും പഠനത്തോടൊപ്പം കുടുംബത്തെ സഹായിക്കാന് അവള് പാര്ട്ട് ടൈം ജോലി കണ്ടെത്തി. ഫെബ്രുവരി 28-ന് രാത്രി, ഡോമിനോസിലെ ജോലി കഴിഞ്ഞ് ഹോസ്റ്റലിലേക്ക് മടങ്ങവേയാണ് അങ്കമാലി ടെല്ക് ജംഗ്ഷനില് വെച്ച് കാര് ജസ്ലിയയെ ഇടിച്ചുതെറിപ്പിച്ചത്.
തലയ്ക്ക് ഗുരുതരമായി പരിക്കേറ്റ ജസ്ലിയയെ പട്രോളിംഗ് ഡ്യൂട്ടിയിലുണ്ടായിരുന്ന അങ്കമാലി പോലീസാണ് ആദ്യം സ്വകാര്യ ആശുപത്രിയിലും പിന്നീട് ആലുവ രാജഗിരി ആശുപത്രിയിലും എത്തിച്ചത്. വിദഗ്ധ ഡോക്ടര്മാരുടെ സംഘം പരമാവധി ശ്രമിച്ചുവെങ്കിലും ഇന്ന് പുലര്ച്ചെ 6.38-ഓടെ മസ്തിഷ്ക മരണം സ്ഥിരീകരിക്കുകയായിരുന്നു.
മകളുടെ വേര്പാടില് തകര്ന്നുപോയെങ്കിലും, അവള് മറ്റുള്ളവരിലൂടെ ജീവിക്കട്ടെ എന്ന പിതാവ് ജോണ്സന്റെയും കുടുംബത്തിന്റെയും തീരുമാനം മഹത്തരമായിരുന്നു. സര്ക്കാര് സംവിധാനമായ കെ-സോട്ടോ വഴിയാണ് അവയവദാന പ്രക്രിയകള് ഏകോപിപ്പിച്ചത്. കരള് ആലുവ രാജഗിരി ആശുപത്രിയില് ചികിത്സയിലുള്ള രോഗിക്ക് കൈമാറി. വൃക്കകള് കോട്ടയം മെഡിക്കല് കോളേജ്, അമൃത ആശുപത്രി എന്നിവിടങ്ങളിലെ രോഗികള്ക്ക് പുതുജീവനേകും. നേത്രപടലം: അങ്കമാലി ലിറ്റില് ഫ്ലവര് ആശുപത്രിയിലെ ഐ ബാങ്കിന് കൈമാറി.
വെറുമൊരു വിദ്യാര്ത്ഥിനി മാത്രമായിരുന്നില്ല ജസ്ലിയ. സ്പോര്ട്സ് പശ്ചാത്തലമില്ലാതെ കോളേജിലെത്തിയ അവള് കഠിനാധ്വാനം കൊണ്ട് എം.ജി യൂണിവേഴ്സിറ്റി യോഗ ടീമിലും ഖോ-ഖോ ടീമിലും അംഗമായി. കോളേജിന് നിരവധി മെഡലുകള് നേടിക്കൊടുക്കുന്നതില് അവള് പ്രധാന പങ്കുവഹിച്ചു. വടംവലി മത്സരങ്ങളില് പോലും ടീമിന് കരുത്തായി അവള് നിന്നു. 'എല്ലാം ശരിയാകും' എന്ന് പറഞ്ഞ് കൂട്ടുകാരെ ആശ്വസിപ്പിച്ചിരുന്ന ആത്മവിശ്വാസത്തിന്റെ പ്രതീകമായിരുന്നു അവള്.
അച്ഛന് ജോണ്സണ്, അമ്മ ലിമ, സഹോദരന് ജാസിന് എന്നിവരുടെ ഏക പ്രതീക്ഷയായിരുന്നു ജസ്ലിയ. അവളുടെ ഓരോ നേട്ടത്തിലും അഭിമാനിച്ചിരുന്ന ആ കൊച്ചു വീടിന് ഈ വിയോഗം താങ്ങാവുന്നതിലും അധികമാണ്. എങ്കിലും, അവള് നല്കിയ കാഴ്ചയിലൂടെയും അവയവങ്ങളിലൂടെയും നാലുപേര് ലോകം കാണുമ്പോള്, ജസ്ലിയ ഇന്നും നമ്മോടൊപ്പം തന്നെയുണ്ട്.
ആദരാഞ്ജലികൾ ...
ഒരു കുടുംബത്തിന്റെ മുഴുവന് സ്വപ്നങ്ങളും പേറി നടന്നിരുന്ന ആ പത്തൊമ്പതുകാരി ഒടുവില് യാത്രയായി : മടങ്ങുമ്പോഴും നാലുപേര്ക്ക് ജീവിതത്തിന്റെ വെളിച്ചം പകര്ന്നു നല്കിയാണ് ജസ്ലിയ ജോണ്സണ് എന്ന മിടുക്കി വിടവാങ്ങുന്നത് ...
Advertisement
Advertisement
Advertisement
