സര്‍വീസ് ചാര്‍ജും സെസും പരിഷ്‌കരിക്കാനായി സര്‍ക്കാര്‍ നിയോഗിച്ച സമിതിയുടെ റിപ്പോര്‍ട്ടിലെ ശുപാര്‍ശകള്‍ സിനിമ മേഖലയെ തകര്‍ക്കുമെന്ന് സംഘടന കുറ്റപ്പെടുത്തി. നിരക്ക് വര്‍ധന നടപ്പിലാക്കരുതെന്ന് ആവശ്യപ്പെട്ട് ചേംബര്‍ സര്‍ക്കാരിന് കത്ത് നല്‍കി.

ടിക്കറ്റ് നിരക്ക് 5 രൂപ മുതല്‍ 15 രൂപ വരെ വര്‍ധിപ്പിക്കാനാണ് സമിതി സര്‍ക്കാരിനോട് ശുപാര്‍ശ ചെയ്തിരിക്കുന്നത്. സാംസ്‌കാരിക മേഖലയിലെ ക്ഷേമപ്രവര്‍ത്തനങ്ങള്‍ക്കായി നിലവില്‍ ടിക്കറ്റൊന്നിന് ഈടാക്കുന്ന മൂന്ന് രൂപ സെസ് വര്‍ധിപ്പിക്കാനാണ് നീക്കം. നിലവില്‍ തന്നെ പ്രതിസന്ധിയിലായ സിനിമാ മേഖലയ്ക്ക് ഈ തീരുമാനം കനത്ത തിരിച്ചടിയാകുമെന്നാണ് വിലയിരുത്തല്‍. സിനിമയില്‍ നിന്ന് മാത്രം പണം പിരിക്കുന്നത് ശരിയല്ലെന്നും ഇരട്ട നികുതി ഒഴിവാക്കണമെന്നും ഫിലിം ചേംബര്‍ ആവശ്യപ്പെട്ടു.

നിരക്ക് വര്‍ധന നടപ്പിലാക്കുന്നതിന് മുന്‍പ് സിനിമാ സംഘടനകളുമായി ചര്‍ച്ച നടത്തുമെന്ന് ധനമന്ത്രി ഉറപ്പ് നല്‍കിയിരുന്നെങ്കിലും, ഏകപക്ഷീയമായ നീക്കമാണ് ഇപ്പോള്‍ നടക്കുന്നത്. വ്യവസായം പ്രതിസന്ധിയില്‍: സിനിമാ ആസ്വാദകരെ തിയേറ്ററുകളില്‍ നിന്ന് അകറ്റാന്‍ മാത്രമേ ടിക്കറ്റ് വില വര്‍ധന സഹായിക്കൂ. സര്‍വീസ് ചാര്‍ജ് വര്‍ധിപ്പിക്കാന്‍ സര്‍ക്കാര്‍ നേരത്തെ എടുത്ത തീരുമാനവും തിയേറ്ററുടമകളെ പ്രതിസന്ധിയിലാക്കിയിട്ടുണ്ട്.

ടിക്കറ്റ് നിരക്ക് വര്‍ധനവില്‍ അന്തിമ തീരുമാനമെടുക്കുന്നതിന് മുന്‍പ് സിനിമയുമായി ബന്ധപ്പെട്ട എല്ലാ സംഘടനകളെയും കേള്‍ക്കാന്‍ സര്‍ക്കാര്‍ തയ്യാറാകണമെന്നാണ് ഫിലിം ചേംബര്‍ ഭാരവാഹികള്‍ ആവശ്യപ്പെടുന്നത്.