ലോകത്തിന്റെ ഏത് കോണിലായാലും തനിമ ചോരാതെ മലയാളി ആഘോഷമാക്കുന്ന പൊന്നോണത്തെ വരവേല്ക്കാന് നാടും നഗരവും ഒരുങ്ങിക്കഴിഞ്ഞു. പൂക്കളങ്ങളും കോടിയുടുത്ത കുരുന്നുകളുടെ പുഞ്ചിരിയും വിഭവസമൃദ്ധമായ സദ്യവട്ടങ്ങളുമായി മഹാബലി തമ്പുരാനെ സ്വീകരിക്കാനുള്ള അവസാനവട്ട ഒരുക്കങ്ങളിലാണ് ഓരോ കുടുംബങ്ങളും.
അത്യാര്ത്ഥിയും അസൂയയുമില്ലാത്ത, മാനുഷരെല്ലാരും ഒന്നുപോലെ വാണിരുന്ന ആ പഴയ നല്ല കാലത്തിന്റെ ഓര്മ്മപ്പെടുത്തലാണ് ഓരോ തിരുവോണവും. കോരിച്ചൊരിയുന്ന മഴയും വെള്ളപ്പൊക്കവും തീര്ത്ത പ്രതിസന്ധികളുടെ കരിനിഴലുകള് മാറ്റിനിര്ത്തി, പ്രത്യാശയോടെയും ആവേശത്തോടെയുമാണ് ഇത്തവണ മലയാളികള് ഓണാഘോഷത്തിലേക്ക് കടക്കുന്നത്. വിപണികളിലെ തിരക്കും തെരുവുകളിലെ ദീപാലങ്കാരങ്ങളും എങ്ങും ആഘോഷലഹരി പടര്ത്തുന്നു.
വീട്ടുമുറ്റങ്ങളില് തിരുവോണപ്പുലരിയില് വലിയ പൂക്കളങ്ങള് ഒരുക്കിയാണ് മലയാളികള് തിരുവോണത്തെ സ്വീകരിക്കുന്നത്. തുമ്പയും തുളസിയും മുക്കുറ്റിയും പൂത്തുനില്ക്കുന്ന നാട്ടിന്പുറങ്ങളില് കുട്ടികളുടെ നേതൃത്വത്തില് പൂവിളികള് ഉയര്ന്നു കഴിഞ്ഞു. ഉച്ചയ്ക്ക് കോടിവസ്ത്രങ്ങള് അണിഞ്ഞ്, വാഴയിലയില് വിളമ്പുന്ന വിഭവസമൃദ്ധമായ സദ്യയും കഴിച്ച്, ഊഞ്ഞാലാടിയും നാടന് കളികളില് ഏര്പ്പെട്ടും മലയാളികള് മാവേലി തമ്പുരാന്റെ വരവ് ആഘോഷമാക്കും.
ഓര്മ്മകളുടെ വസന്തമാണ് ഓണം. ജാതിമത ഭേദമന്യേ, ധനികനെന്നോ ദരിദ്രനെന്നോ വ്യത്യാസമില്ലാതെ എല്ലാവരും മനുഷ്യന് എന്ന ഒറ്റ മനസ്സോടെ ഒത്തുചേരുന്ന കേരളത്തിന്റെ ഏറ്റവും വലിയ സാംസ്കാരിക കൂട്ടായ്മയാണ് ഈ ഉത്സവം.
മാവേലി തമ്പുരാന് നാടുവാണിരുന്ന ആ പഴയ നല്ല കാലത്തിന്റെ ഓര്മ്മപ്പെടുത്തലാണ് പ്രിയപ്പെട്ട തിരുവോണം. 'മാവേലി നാടു വാണീടും കാലം, മാനുഷരെല്ലാരും ഒന്നുപോലെ' എന്ന പാട്ടുപോലെ, ആളുകള്ക്കിടയില് കള്ളവും ചതിയും പൊളിവചനങ്ങളുമില്ലാത്ത സമത്വത്തിന്റെ പ്രതീകമാണ് ഓണം.
ഐശ്വര്യവും സമൃദ്ധിയും നിറഞ്ഞ ഒരു നല്ല നാളെയെ പണിതുയര്ത്താന് ഈ പൊന്നോണം ഏവര്ക്കും വഴികാട്ടിയാകട്ടെ.
ഏവര്ക്കും സി മീഡിയ കുടുംബത്തിന്റെ ഹൃദയം നിറഞ്ഞ ഓണാശംസകള് ...
