ആദായനികുതി നിയമത്തിലെ ലഘൂകരണം മുതൽ ഡിജിറ്റൽ സുരക്ഷാ മാനദണ്ഡങ്ങൾ വരെ ഇതിൽ ഉൾപ്പെടുന്നു.

1. ഏറെ പഴക്കമുള്ള ആദായനികുതി ചട്ടങ്ങളിൽ വലിയ മാറ്റം വരുന്നു. ഇനി മുതൽ ഫിനാൻഷ്യൽ ഇയർ (FY), അസസ്‌മെന്റ് ഇയർ (AY) എന്നിങ്ങനെയുള്ള വേർതിരിവ് ഉണ്ടാകില്ല. പകരം ‘ടാക്സ് ഇയർ’ എന്ന ഒറ്റ സംവിധാനം നിലവിൽ വരും. അതായത്, വരുമാനം നേടുന്ന വർഷവും ടാക്സ് ഫയൽ ചെയ്യുന്ന വർഷവും ഒന്നായി പരിഗണിക്കും. ഫോം 15G, 15H എന്നിവ ലയിപ്പിച്ച് ‘ഫോം 121’ എന്ന ഏകീകൃത ഫോം നിലവിൽ വന്നു.

2. ഓൺലൈൻ തട്ടിപ്പുകൾ തടയുന്നതിന്റെ ഭാഗമായി ആർബിഐ പുതിയ സുരക്ഷാ മാനദണ്ഡങ്ങൾ നടപ്പിലാക്കി. ഡിജിറ്റൽ ഇടപാടുകൾക്ക് ഇനി ഒടിപി മാത്രം പോരാ. പകരം പിൻ നമ്പർ, ഫിംഗർ പ്രിന്റ് അല്ലെങ്കിൽ ഫേസ് സ്കാൻ എന്നിവയിൽ ഏതെങ്കിലും ഒന്ന് കൂടി നിർബന്ധമാക്കി.

3. സ്വർണ്ണപ്പണയ വായ്പകളിൽ റിസർവ് ബാങ്ക് പുതിയ ടിയേർഡ് ഘടന കൊണ്ടുവന്നു.

₹2.5 ലക്ഷം വരെ: സ്വർണ്ണവിലയുടെ 85% വരെ വായ്പ ലഭിക്കും.

₹2.5 – 5 ലക്ഷം: 80% വായ്പ.

₹5 ലക്ഷത്തിന് മുകളിൽ: 75% വായ്പ.

വായ്പ തിരിച്ചടച്ചാൽ 7 പ്രവൃത്തി ദിവസത്തിനുള്ളിൽ സ്വർണ്ണം തിരികെ നൽകണം. വൈകിയാൽ ബാങ്ക് പ്രതിദിനം 5000 രൂപ പിഴ നൽകേണ്ടി വരും.

4. വാർഷിക ഫാസ്ടാഗ് പാസ് നിരക്ക് 3000 രൂപയിൽ നിന്ന് 3075 ആയി ഉയർത്തി. സൗജന്യ പരിധി കഴിഞ്ഞുള്ള എടിഎം ഇടപാടുകൾക്ക് ഇനി മുതൽ 21 രൂപയ്ക്ക് പകരം 23 രൂപ നൽകണം. യുപിഐ വഴിയുള്ള എടിഎം പണം പിൻവലിക്കലുകളും ഇനി ബാങ്കിന്റെ സൗജന്യ പരിധിയിൽ ഉൾപ്പെടും. ബയോമെട്രിക് വിവരങ്ങൾ കൃത്യമായുള്ളവർക്ക് പാൻ കാർഡ് ലഭ്യമാക്കുന്നതിനും പുതുക്കുന്നതിനും കൂടുതൽ ലളിതമായ നടപടിക്രമങ്ങൾ ഇന്ന് മുതൽ നിലവിൽ വന്നു.