സുരക്ഷ മെച്ചപ്പെടുത്തുന്നതിനും അന്താരാഷ്ട്ര യാത്ര എളുപ്പമാക്കുന്നതിനുമാണ് ഇന്ത്യ ഔദ്യോഗികമായി ഇ-പാസ്‌പോർട്ടുകൾ വിതരണം ചെയ്യുന്നത്.

നിരവധി പുതിയ സവിശേഷതകൾ, മെച്ചപ്പെട്ട സുരക്ഷ, വേഗത്തിലുള്ള പരിശോധന, എളുപ്പത്തിലുള്ള അന്താരാഷ്ട്ര യാത്ര എന്നിവ പുതിയ ഇ-പാസ്‍പോർട്ടുകൾ വാഗ്‌ദാനം ചെയ്യുന്നു. 2024 ഏപ്രിൽ 1ന് ഒരു പൈലറ്റ് പ്രോജക്റ്റായി വിദേശകാര്യ മന്ത്രാലയം ഈ സേവനം ആരംഭിച്ചിരുന്നു. നിലവിൽ രാജ്യത്തുടനീളമുള്ള തിരഞ്ഞെടുത്ത പാസ്‌പോർട്ട് സേവാ കേന്ദ്രങ്ങളിൽ ഇ-പാസ്‌പോർട്ട് സേവനം ലഭ്യമാണ്. വരും മാസങ്ങളിൽ കൂടുതൽ കേന്ദ്രങ്ങളിൽ ഇ-പാസ്പോർട്ട് സേവനം എത്തുമെന്ന് പ്രതീക്ഷിക്കുന്നു.

ഇ-പാസ്‌പോർട്ട് എന്നത് ഇന്ത്യയിലെ ഒരു പരമ്പരാഗത പാസ്‌പോർട്ടിന്റെ നവീകരിച്ച പതിപ്പാണ്. ഇത് ഭൗതികവും ഡിജിറ്റലുമായ സവിശേഷതകളും സമന്വയിപ്പിക്കുന്നു. ഇതിൽ ഒരു എംബഡഡ് റേഡിയോ ഫ്രീക്വൻസി ഐഡന്‍റിഫിക്കേഷൻ (RFID) ചിപ്പും ആന്‍റിനയും ഉണ്ട്. ഇത് വ്യക്തിഗത വിവരങ്ങളും വിരലടയാളം, ഡിജിറ്റൽ ഫോട്ടോഗ്രാഫ് തുടങ്ങിയ ബയോമെട്രിക് വിശദാംശങ്ങളും സുരക്ഷിതമായി സൂക്ഷിക്കുന്നു. പുറമേ നിന്ന് നോക്കുമ്പോൾ, പാസ്‌പോർട്ട് പേരിന് തൊട്ടുതാഴെയായി മുൻ കവറിൽ അച്ചടിച്ചിരിക്കുന്ന ഒരു ചെറിയ ഗോൾഡൻ ചിഹ്നം കൊണ്ട് ഇത് തിരിച്ചറിയാൻ കഴിയും. ഇ-പാസ്‌പോർട്ട് സ്റ്റാൻഡേർഡ് പാസ്‌പോർട്ടിന് പകരമല്ല, മറിച്ച് സുരക്ഷ ശക്തിപ്പെടുത്തുന്നതിനും സുതാര്യത വർധിപ്പിക്കുന്നതിനും അന്താരാഷ്ട്ര യാത്രാ പ്രക്രിയ സുഗമവും കാര്യക്ഷമവുമാക്കുന്നതിനും ലക്ഷ്യമിട്ടുള്ള ഒരു നൂതന പതിപ്പാണെന്നത് ശ്രദ്ധിക്കേണ്ടതാണ്.

ഇ-പാസ്‌പോർട്ടിന് എങ്ങനെ അപേക്ഷിക്കാം?

1. ഔദ്യോഗിക പാസ്‌പോർട്ട് സേവാ പോർട്ടൽ സന്ദർശിക്കുക.

2. ഒരു പുതിയ അക്കൗണ്ടിനായി രജിസ്റ്റർ ചെയ്യുക അല്ലെങ്കിൽ സൈൻ-ഇൻ ചെയ്യുക, തുടർന്ന് ഇ-പാസ്‌പോർട്ട് അപേക്ഷാ ഫോം പൂരിപ്പിക്കുക.

3. നിങ്ങളുടെ അടുത്തുള്ള പാസ്‌പോർട്ട് സേവാ കേന്ദ്രം (PSK) അല്ലെങ്കിൽ പോസ്റ്റ് ഓഫീസ് പാസ്‌പോർട്ട് സേവാ കേന്ദ്രം (POPSK) തിരഞ്ഞെടുക്കുക.

4. ബാധകമായ ഇ-പാസ്‌പോർട്ട് ഫീസ് ഓൺലൈനായി അടയ്ക്കുക.

5. പണമടച്ചതിന് ശേഷം, അപ്പോയിന്‍റ്‌മെന്‍റ് ബുക്ക് ചെയ്‌ത് ബയോമെട്രിക് പരിശോധനയ്ക്കായി പാസ്‌പോർട്ട് സേവാ കേന്ദ്രത്തിലേക്ക് പോകുക.